Wanderlust

 

Непознат глас слушаш низ прозорец,

низ мрак се пробива додека спиеш.

Повик за пат во непознат правец

и почнуваш внатре во себе да вриеш.

 

И нема тука простор за мисла втора,

ти си птица која спрема слободен лет.

На повикот да се одговори мора -

во ранец е спакуван твојот мал свет.

 

На неколку дена стануваш странец,

правиот „ти“ е ставен на пауза.

За добри вибрации сега си мамец,

ја избираш својата наредна кауза.

 

А кога спомени гледаш во ретровизор

после тмурниот претежок ден,

со очи затворени го бараш тој призор

кога далеку негде беше слободен.