Девојка со двоен лик

 

Таа стои до шанкот под нејасно светло,

цела во црно претопена в мрак.

Oвде светот е потчинет, сопствен,

пулсира ноќта во ритамот нејзин.

 

Таа е храбра, независна, горда...

 

Околу неа ѕидови, челични врати,

став кој не може да го има секој.

Полици книги и длабоки песни,

таа е Фројд, Рундек и Кејв.

 

Таа е умна, недостапна, своја...

 

Низ сенките бара прекрасни лица,

трофеи што зрачат со заносен сјај.

Страста се буди и пламнува јако

а честа се скрива зад превез од јад.

 

Таа е покорна, заносна, дива...

 

Средува мисли и убива чувства

низ разговор лесен со било кој лик.

Невидливи светла минат низ дождот

а ветрот ја кани на нов ноќен поход.

 

Таа е очајна, скршена, празна...

 

Молк е во паркот, умира денот.

Замаглен поглед, неврзани мисли.

Мирис на вино дава мил лик

на пропуштен живот, на еден друг свет.

 

Таа потонува...

Таа потонува...