Носталгија

 

Од некаде се слушна музика...

Ја донесе ветрот од друг крај на градот

или пронајде излез од некој заборавен,

напуштен ходник на потсвеста. 

 

Од музика се создадоа слики...

Кадри замрзнати во момент.

Некои познати и пречесто гледани,

некои вратени кришум од заборав.

 

Сликите станаа подвижни...

Со нив се разбудија сите сетила.

Се мешаа мириси, звуци и зборови

во конечна форма на искусени спомени. 

 

Поглед кон светот останат зад нас...

Враќање во лично минато време...

Тага, радост, тишина, смеа...

Печат на секој одминат момент. 

 

Сменети лица и забрзан живот,

а немо опстојува онаа надеж,

дека зад седата коса и формален изглед

сме истите стари несменети ние.